İyunun 5-dən 9-dək Bakıda Fotosintez Tədqiqatları üzrə Beynəlxalq Cəmiyyətin (İSPR) təşəbbüsü ilə akademik Cəlal Əliyevin 85 illik yubileyinə həsr olunan “Cəlal Əliyev. Davamlı inkişaf üçün fotosintez tədqiqatları – 2013” mövzusunda beynəlxalq konfrans keçiriləcəkdir.
AzərTAc xəbər verir ki, konfransda fotosintez prosesinin bütün istiqamətləri, o cümlədən hidrogenin alınması və süni fotosintez problemləri ətrafında geniş müzakirələr aparılacaqdır.
Konfransın materialları beynəlxalq “Biochemica et Biophysica Acta (Bioenergetics)” və “Plant Physiology and Biochemistry (PPB)” jurnallarının xüsusi buraxılışlarında çap olunacaqdır.
Azərbaycanlı alimə həsr olunan bu cür irimiqyaslı beynəlxalq elmi tədbirin Bakıda ilk dəfə keçirilməsi akademik Cəlal Əliyevin şəxsiyyətinə olan böyük hörmət, fotosintezin tədqiqi sahəsində onun və yaratdığı məktəbin əldə etdiyi misilsiz nailiyyətlər, qazanılan uğurların dünya elmi ictimaiyyəti tərəfindən yüksək qiymətləndirilməsi ilə bağlıdır.
Şübhəsiz ki, bu konfrans Azərbaycan elminin təbliğində və onun dünya elminə inteqrasiyasında mühüm rol oynayacaq, eyni zamanda, respublikamızda elmin digər sahələrinin dinamik inkişafına güclü təkan verəcəkdir.
Ətraflı məlumatı www.photosynthesis2013.cellreg.org saytından əldə etmək olar.